မြန်မာပြည်ရွေးကောက်ပွဲတွေမှာ PR စနစ် ကျင့်သုံးရေး လှုပ်ရှားမှုက ရွေးကောက်ပွဲကော်မရှင်ဆီကိုလည်း ရောက်ပါတယ်။
ဒီဇင်ဘာလက နေပြည်တော် ရွေးကောက်ပွဲ ကော်မရှင်ရုံးမှာ တွေ့ရတဲ့ ကော်မရှင်လူကြီးများ နဲ့ နိုင်ငံရေးသမားတချို့ (ဓာတ်ပုံ - ဧရာဝတီ)
မြန်မာပြည်မှာ ကျင့်သုံးခဲ့တဲ့ စနစ်က မဲအများဆုံးရတဲ့သူ နိုင်တဲ့ စနစ် ဖြစ်ပါတယ်။
အခု ပြောနေကြတဲ့ PR စနစ် ဆိုတာက အချိုးကျကိုယ်စားပြုစနစ် (Proportional Repersentatin) ဖြစ်ပါတယ်။
ကော်မရှင်က ပါတီ ၄၀ ကျော်၊ အရပ်ဘက်အဖွဲ့ ၉ ဖွဲ့တို့နဲ့ တွေ့ဆုံရာမှာ ဒီကိစ္စ ဆွေးနွေးခဲ့ပါတယ် တဲ့။ စနစ်ဟောင်း ဆက်ကိုင်မလား၊ စနစ်သစ်ကို သွားမလား ပေါ့လေ။
သဘောထားတွေကတော့ နှစ်ခု ထွက်လာတယ်။ အသစ်ကို သုံးမယ်၊ မသုံးဘူး ဆိုတဲ့ သဘောထား နှစ်ခုပါ။
သုံးမယ် ဆိုရင်တော့ ကော်မရှင်က သူတို့ရဲ့ လုပ်ထုံးလုပ်နည်းတပုံကြီးကို ပြောင်းလဲရတော့မှာပါ။
“လက်ရှိကျင့်သုံးလျက်ရှိသော မဲအများဆုံးရသူကို အနိုင်ပေးသည့်စနစ်မျ အချိုးကျကိုယ်စားပြုစနစ်သို့ ပြောင်းလဲ ကျင့်သုံးမည် ဆိုပါက ပြည်ထောင်စုရွေးကောက်ပွဲကော်မရှင် အနေဖြင့် ..... များပြားလှသော လုပ်ငန်းတာဝန်များကို အချိန်ယူ ဆောင်ရွက်သွားရမည်ဖြစ်ပါသည်” လို့ ကော်မရှင်က ပြီးခဲ့တဲ့ စနေနေ့မှာ သတင်းစာထဲ ကြော်ငြာထည့်လိုက်ပါတယ်။
များပြားလှသော လုပ်ငန်းတာဝန်များ ဆိုတာတွေကတော့
- လိုအပ်သည့် နည်းဥပဒေများ၊ လုပ်ထုံးလုပ်နည်းများ ပြုပြင်ရေးဆွဲရခြင်း၊
- ရွေးကောက်ပွဲကော်မရှင် အဖွဲ့ခွဲ အဆင့်ဆင့်နှင့် ၀န်ထမ်းများကို လေ့ကျင့် သင်ကြားပေးရခြင်း၊
- နိုင်ငံရေးပါတီများနှင့် ပြည်သူလူထုကို မဲပေးခြင်းနှင့်စပ်လျဉ်း၍ အသိပညာပေးရခြင်း၊
- ပြောင်းလဲသွားမည့် ရွေးကောက်ပွဲ အခင်းအကျင်းသစ်အတွက် အုပ်ချုပ်မှု ကိစ္စများ ကြိုတင်စီမံ ဆောင်ရွက်ရခြင်း
စသဖြင့် စသဖြင့် ဖြစ်ပါတယ်။
ဒီအလုပ်တွေအတွက် ကော်မရှင်မှာ အချိန် လိုပါတယ်။
PR စနစ်ကို သွားမယ် ဆိုရင် ဒီနှစ်ထဲမှာ အပြီးသတ် ဆုံးဖြတ်ကြဖို့ ပြည်ထောင်စုလွှတ်တော်ကို တင်ပြထားပါတယ် တဲ့။ ပြီးခဲ့တဲ့လ ၁၃ ရက်နေ့က တင်ပြထားပါတယ် တဲ့။ (ကော်မရှင် ကြော်ငြာရဲ့ နောက်ဆုံးပိုဒ်မှာ ဖတ်ပါ)
အမတ်မင်းများကိုလည်း ဒီကိစ္စကို ပြီးခဲ့တဲ့လ ၂၃ ရက်နေ့ ကတည်းက အကြောင်းကြားခဲ့တယ် ဆိုပဲ။
ဒီတော့ ကော်မရှင်ရဲ့ တာဝန် ကျေပြီပေါ့။
၂၀၁၅ မှာ PR စနစ်ကို သုံး မသုံး ဆုံးဖြတ်ဖို့ အချိန် ၆ လသာ ကျန်တော့တယ်လို့ ကော်မရှင်က သံချောင်းခေါက်လိုက်ခြင်းပါ။
PR စနစ်ကို ထောက်ခံကြ ကန့်ကွက်ကြတဲ့ အသံတွေကို
၂၀၁၅ ရွေးကောက်ပွဲတွင် PR စနစ် ကျင့်သုံးရန် ကြံ့ခိုင်ရေးပါတီ ထောက်ခံနိုင်ကြောင်း ဦးအောင်သောင်းပြော
http://burma.irrawaddy.org/archives/42423
ဆိုတဲ့ သတင်းမှာ ပြည့်ပြည့်စုံစုံ ဖတ်ရှုနိုင်ပါတယ်။
မကြာခင် လွှတ်တော် အစည်းအဝေးများ ပြန်လည် အစပြုတော့မှာဖြစ်တဲ့အတွက် တက်ကြွလှုပ်ရှားလေ့ရှိတဲ့ အမတ်မင်းများလည်း
PR စနစ် ဘာပါလိမ့် ဆိုတာကို လေ့လာနေပြီလို့ ယူဆရပါတယ်။
.