လူမှုကွန်ရက်မှာ နာမည်ကြီးနေတဲ့ ကလေးငယ်နှစ်ဦးဓာတ်ပုံရဲ့မူလဇာတ်ကြောင်း

photo - nason nguyen

ပြီးခဲ့တဲ့ ရက်သတ္တပတ် အနည်းငယ်က နီပေါငလျင်အပြီး လူမှုမီဒီယာတွေမှာ တဦးကို တဦးဖက်တွယ်ထားကြ တဲ့ ကလေးငယ်နှစ်ဦးရဲ့ပုံဟာ “နီပေါနိုင်ငံမှ (၂)နှစ်အရွယ် ညီမငယ်လေးကို စောင့်ရှောက်နေတဲ့ (၄)နှစ်သားအရွယ် အစ်ကို”ဆိုတဲ့ ခေါင်းစဉ်နဲ့ ဖေ့ဘုတ်နဲ့ တွစ်တာ စာမျက်နှာတွေမှာ အလျင်အမြန်ပျံ့နှံ့ နေခဲ့ပါတယ်။

ဒီဓါတ်ပုံဟာ လူမှုကွန်ရက်စာမျက်နှာတွေမှာ အများဆုံး ဖော်ပြခြင်းခံရတဲ့ ပုံတစ်ပုံလည်းဖြစ်ပါတယ်။ မြင်ရတဲ့သူကို စိတ်မကောင်းကြီးစွာဖြစ်စေတဲ့ ဒီဓါတ်ပုံထဲမှာတော့ ကလေးငယ်နှစ်ဦးဟာ တစ်ဦးကိုတစ်ဦး ဖက်တွယ်ထားကြပြီး မိန်းကလေးငယ်လေးဟာ သူ့အစ်ကိုကို တွယ်ကပ်ရင်း သူတို့အတွက် ပြင်ပကမ္ဘာမှာ နားခိုရာနေရာကို လှမ်းရှာနေသလို အနေအထားဖြစ်နေပါတယ်။ အစ်ကိုဖြစ်သူ ယောကျာ်းကလေးရဲ့ မျက်လုံးထဲမှာလည်း အကြောက်တရားတွေနဲ့ ပြည့်နှက်နေတာကို တွေ့ရမှာပါ။ မြင်ရသူအဖို့ ၀မ်းနည်းကြေကွဲသွားစေမယ့် ပုံတစ်ပုံလည်း ဖြစ်ပါတယ်။

ဒါ့ထက် ငလျင်ဘေးသင့်သူတွေထဲက ရှာဖွေတွေ့ရှိခဲ့ရတဲ့ မောင်နှလေးနှစ်ဦးအတွက် ကုသိုလ် အလှူပြုကြဖို့ ဖိတ်ခေါ်ထားတာမျိုးကိုတောင် တွေ့ရမှာပါ။
တကယ်တော့ ဒီ ဓါတ်ပုံဟာ လွန်ခဲ့တဲ့ (၁၀)နှစ်လောက်က ဗီယက်နမ် မြောက်ပိုင်းမှာ ရိုက်ခဲ့တဲ့ ဓါတ်ပုံလေးတစ်ပုံသာ ဖြစ်ပါတယ်။

ဓါတ်ပုံရဲ့ မူရင်းပိုင်ရှင် ဖြစ်သူ ဗီယက်နန် ဓါတ်ပုံဆရာ နစန် ငုရန်ကတော့ “ ဒီဓါတ်ပုံလေးကို (၂၀၀၇) အောက်တိုဘာလတုန်းက ဟဂျန်ဒေသမှာရှိတဲ့ ကန်တိုင်ရွာကလေးမှာ ရိုက်ကူးခဲ့တာပါ၊ အဲဒီရွာကို ကျွန်တော်ဖြတ်သွားတုန်း အိမ်ရှေ့မှာ ကလေးနှစ်ယောက် ဆော့ကစားနေတဲ့ မြင်ကွင်းကို မြင်တွေ့ခဲ့ရပါတယ်။ သူတို့တတွေရဲ့ မိဘတွေဟာ အဲဒီအချိန်တုန်းက လယ်ထဲမှာ အလုပ်လုပ်နေကြတာပါ။ ကလေးမလေးဟာ (၂)နှစ်သာသာလေးပဲ ရှိဦးမှာပါ။ လူစိမ်းတစ်ဦးရောက်လာလို့ ကြောက်လန့်ပြီး ငိုနေလို့ (၃)နှစ်အရွယ်လောက် ရှိနိုင်တဲ့ သူမရဲ့ အစ်ကိုက ညီမလေးကို ဖက်ထားပြီး ချော့မြူနေတာပါ၊ အဲဒီမြင်ကွင်းလေးက ကျွန်တော့် စိတ်ကို လှုပ်ရှားသွားစေလောက်အောင် ချစ်စဖွယ်ဖြစ်တာမို့ ဓါတ်ပုံ အမြန်ရိုက်ကူး မှတ်တမ်းတင်လိုက်ခြင်းပဲ ဖြစ်ပါတယ်” လို့ ဘီဘီစီ သတင်းဌာနကို ဆိုပါတယ်။

ဓါတ်ပုံဆရာ နစန်ဟာ သူ့ရဲ့ ကိုယ်ပိုင် ဘလော့စာမျက်နှာမှာ အဲဒီဓါတ်ပုံကို တင်ထားခဲ့ပြီး နောက်သုံးနှစ် အကြာမှာတော့ “အစွန့်ပစ်ခံ မိဘမဲ့ကလေးများ”ဆိုတဲ့ ခေါင်းစဉ်နဲ့ ဗီယက်နမ် ဖေ့ဘုတ် သုံးစွဲသူများက အဲဒီဓါတ်ပုံကို တဆင့်မျှဝေနေတာကို အံ့အားသင့်စွာ တွေ့ရှိခဲ့ရပါတယ်။

တချို့သူတွေဆို အဲဒီ ကလေးနှစ်ယောက်ရဲ့ ပုံကို လုပ်ဇာတ်တွေရေးပြီး ပိုလို့ ရှုပ်ထွေးအောင်လုပ်ခဲ့ကြပါတယ်။ ဥပမာ “ကလေးရဲ့ မိခင်က ဆုံးပါသွားပြီး ဖခင်ကလည်းစွန့်ပစ်ခဲ့တယ်” ဆိုတဲ့ ဇာတ်လမ်းမျိုးတွေပေါ့။ အဲဒီမှာတင်မရပ်သေးဘဲ အချို့သူတွေက အဲဒီဓါတ်ပုံကိုပဲ “ မြန်မာနိုင်ငံက မိဘမဲ့ကလေးများ”၊ “ ဆီးရီးယားနိုင်ငံမှ ပြည်တွင်းစစ်ဒဏ် သင့်နေသူများ” ဆိုပြီး ခေါင်းစဉ်အမျိုးမျိုးတပ်ပြီး မျှဝေခဲ့ပါသေးတယ်။

ဓါတ်ပုံဆရာ နစန်ကတော့ အဲဒီပုံရဲ့မူပိုင်ရှင်ဟာ သူပဲဖြစ်ပါတယ်လို့ ရှင်းလင်းချက်ထုတ်ပြီး အသိပေးခဲ့ပေမယ့် အောင်မြင်မှု အနည်းငယ်သာ ရရှိခဲ့ပါတယ်။ “အဲဒီဓါတ်ပုံဟာ အများဆုံး ပြန်လည်ဖော်ပြခြင်း ခံရတဲ့ ပုံတစ်ပုံ ဖြစ်ကောင်းဖြစ်ပါလိမ့်မယ်။ ဒါပေမယ့် ကံဆိုးစွာပဲ နောက်ခံအကြောင်းအရာတွေကတော့  မှားယွင်းလို့ နေပါတယ်” လို့ နစန် ကဆိုထားပါတယ်။

ဒီလိုအဖြစ်အပျက်တွေဟာ မြန်မာပြည်ရဲ့ လူမှုကွန်ရက်စာမျက်နှာတွေမှာလည်း မကြာခဏ ဆိုသလို ဖြစ်ပျက်နေကြတာပါ။ အင်တာနက်သုံးစွဲသူတွေကြား ထင်ယောင်ထင်မှားဖြစ်နေနိုင်မယ့် မမှန်ကန် တဲ့ သတင်း သို့မဟုတ် သတင်းဓာတ်ပုံ အမှားတွေ ထင်ရာမြင်ရာ ရေးသားတင်ပြနေကြတာလို့ ဆိုရမှာပါ။ ဒီအဖြစ်အပျက်တွေအကြား မြန်မာပြည် အင်တာနက်သုံးစွဲသူ အသိုင်းအ၀ိုင်းကတာ့ စိတ်မထင်ရင် မထင်သလို ရေးသားပြောဆို ဆဲဆိုရေးသားနေကြတဲ့ ကွန်းမန့်တွေနဲ့ ပြည့်နှက်နေတယ်ဆိုရင် မမှားပါဘူး။

မူရင်းဓာတ်ပုံပိုင်ရှင်တွေကတော့ ကိုယ်ဓာတ်ပုံဟာ ကျော်ကြားအောင်မြင် လူသိများလာလို့ ၀မ်းသာရမှာလား ဒါမှမဟုတ် ကိုယ့်ရည်ရွယ်ရင်းနဲ့ကိုယ် ရိုက်ကူးထားတာ ပျောက်အောင် လုပ်ဆောင်ခံရမှုအပေါ် ၀မ်းနည်းရမှာလား ဆိုသလိုဖြစ်နေပါပြီ။



ခင်အေးမြလွင်

ကိုးကားသတင်း။   ။http://www.bbc.com/news/world-asia-32579598